Naidungpar dagiti naka-motorsiklo iti poste ti kuryente iti National Highway paset ti Brgy. 10, San Vicente iti ili a Bacarra
Nabigbig ti driver ti motorsiklo a ni Jerome Constantine, agtawen ti 19, awanan asawa ken residente ti Brgy. 32, Corocor iti nadakamat nga ili idinto a ti lubbon na ket ni Gerald Tolentino, agtawen ti 24 ken residente ti Brgy. 14, Binsang iti ili a Pasuquin.
Segun kenni Police Staff Sergeant Randy Pastor, bayat nga agturturong nga agpalaud a direksyon dagiti biktima idi maawanan ti preno a nangitunda ti pannakadungparda ti poste ti kuryente.
Gapu iti daytoy nagsagaba da ti sugat iti nagduduma a paset ti bagida rason a dagus a naitaray da iti Gov. Roque Ablan Senior Memorial Hospital ditoy ciudad ti Laoag.
Kuna ni Pastor nga awan ti suot nga helmet dagiti biktima ken adda da pay ti impluwensya ti nasanger.
