LAOAG CITY – Mangnamnama ni Ms. Angie Ansagay, Presidente ti Laoag City Chenbaro Association nga iti kabiitan a panawen ket makataripnong da ni Mayor Michael Marcos Keon.
Daytoy ket tapno ipadanon ken masolusyonan dagiti nagduduma a problema a nagtaud iti nasao a merkado publiko.
Segun kenni Ansagay, naipadanon kenkuana dagiti arungaing dagiti dadduma a kakadua da nga aglaklako isut gapo na a nagsurat da kenni Mayor Keon.
Inbatad na a ti nasao a surat ket naipatulod tapno maipakammo iti mayor ti sitwasyon da iti agdama kas iti issyu seknan iti comfort room, ti maipagarop a pannakadoble ti singir ti ticket kadagiti vegetable vendors ken dadduma pay.
Mainaig iti daytoy, kuna pay ni Ansagay a sumagmamano kadagiti linaon ti surat da kenni Mayor Keon ket nasolbaren babaen iti OIC.
