LAOAG CITY – Inpakaammo ni Mr. Jerry Fermin, ti agdama nga Officer-in-Charge ti Laoag City Disaster Risk Reduction and Management Office nga agkurang ti lima nga equipment iti opisinada.

Segun kenkuana, pakairamanan ditoy ti 4 by 4 pick-up rescue vehicle, boom truck, ambulansia ken dadduma pay.

Inbatadna a daytoy ti kalikagumda a magatang babaen ti pannakausar ti balbaliw a pannakailatang ti 24 milyon a pisos a pondo iti opisinada.

Mainaig iti daytoy, inlawlawag ni Ms. Erlinda Caspe ti dati nga Officer-in-Charge ti City Disaster Risk Reduction and Management Office ditoy siudad ti Laoag idi tawen 2022 ket nakaalada idin ti permit to purchase iti Department of the Interior and Local Government ngem saan daytoy a natuloy gapu ta masapolda pay ti mangala ti authorization manipod iti Department of Budget and Management.

Kabayatanna, kinuna ni Dr. Melvin Manuel, ti dati met nga Officer-in-Charge ti City Disaster Risk Reduction and Management Office ditoy siudad nga adda dagiti unheld radio para iti City Social Welfare and Development Office, City Engineering Office ken General Services Office a saanen a natuloy a nagatang gapu iti panangipangpangrunada iti COVID-19 response.

Inpalgakna a saan pay a nagatangen ti military truck a mausar para iti panagrespondeda tunggal adda ti sumangbay a didigra gapu ta awan idi ti magatang a first hand gapu ta second hand laeng ti adda nga available.

Nupay kasta, kunana a saan met nga ipalubos ti lokal a gobierno a gumatang ti second hand gapu ta masapol a brand new ken naiget a maipawil ti pananggatang iti second hand a lugan.

Pakaseknan iti daytoy, inbatad ni Sangguniang Panlungsod Member RJ Farinas a kalikagum ti lokal a gobierno ditoy siudad ti Laoag a gumatang ti dua nga units ti pickup truck ita a tawen nga agbalor ti 3.4 milyon a pisos iti maysa nga agdagup amin ti 6.8 milyon a pisos.

Maipalagip a kwinestionaran ti konseho kangrunaanna da Sangguniang Panglungsod Member Atty. Jason Perera ken Sangguniang Panlungsod Member RJ Farinas no apay ita laeng a tawen a magatang dagiti nasao nga heavy equipment ditoy siudad ti Laoag.