LAOAG CITY – In-inuten a bumangbangon ti Laoag City General Hospital.
Daytoy ti panangdiskribir ni Mr. Edgar Pascual ti City Accountant ditoy ciudad ti Laoag.
Segun kenkuana ket dakkel ti nagbaliwan ti nasao nga ospital gapu ta ngimmato ti binulan a mapaspastrekdan.
Naamuan a ti target collection ti kada bulan ket 4.6 million ngem nangat-ngato ti 50 a porsyento ti mapaspastrekda wenno pito a milyon a pisos, bayat a 37 a milyon ti gross income-da iti kada tawen.
Kuna ni Pascual a dakkel a tulong ti aggapo iti PhilHealth ken Medical Assistance for Indigent Patient a 28 a milyon a pisos, pakairamanan pay ti subsidy manipud iti City Government.
Gapu iti daytoy ket inpakaammo pay ni Pascual a maipa-paayen ti binulan a sweldo, pakairamanan ti bonus ken clothing allowance dagiti empleado sipud pay iti tawen 2023.
Malaksid iti daytoy ket marugian payen a mabayadan dagiti utang ti ciudad a medical supplies nga aggatad iti 2.3 million pesos a nagatang idi 2023.
Kabayatanna, manamnama a ngumato pay ti mapastrek ti nasao nga ospital gapu ti panagsangpet dagiti medical equipment a ginatang ti ciudad, ken dagiti inpaay ti Department of Health kasta pay ti inpaay ti opisina ni First District Representative Sandro Marcos nga State of the Art CT-scan ken X-ray machine.
Mainaig iti daytoy ket maragsakan ni Mayor Michael Marcos Keon, gapu ta iti laksid ti napasaran ti nasao nga ospital ket in-inoten a bumangbangon.
