LAOAG CITY – Nagballigi ti Laoag City–Ilocos Norte Taekwando Club iti pannakibalubal da iti 6th Daedo Taekwando Open Championship a naangay iti Toa Payoh Sports Hall idiay Singapore.
Segun kenni Coach Cleofas Bumanglag, sipud naawat da ti imbitasyon manipud kenni Master Lai Han Seng idi Setyembre ket nangrugi dan nga ag-training para iti nasao a torneo.
Karaman kadagiti nakagun-od ti medalya ket da Noli Charles Malipot a nakaala ti gold iti sparring-heavy weight; kasta met a gold kenni Trixie Anne Baraoidan iti sprring Bantham weight ken bronze iti Poomsae, brown belt category; Kristine Kate Manalo iti sparring fin weight ken maysa a Bronze iti Pommsae black belt; Benj Andrei Abrojena a nakaala ti silver iti poomsae blue belt; bronze met kenni Jhon Christian Andres iti sparring – fin weight; dua a bronze kenni Martin Merlyngem Lucas iti poomsae black belt ken sparring light weight; dua a silver met kenni Benjamin Johaekim Ricardo iti sparring welter weight ken breaking wood board ken bronze iti poomsae black belt kenni Mark Kenzy Yadao nga addaan ti tallo a bronze iti sparring lightheavy weight, poomsae black belt ken breaking wood board.
Inlawlawag na a babaen ti disiplina iti bagbagi ket nagun-od da ti balligi ken ti panangmenternar dagiti ubbing ti timbang da.
Inbatad na nga adda ti criteria a sinurot da ken pinagtalinaed na ti napintas a relasyon dagit players iti tunggal maysa.
Kunana a nakapan da idiay Singapore babaen ti tulong pinansyal nga inpaay dagiti naayat a timmulong kadakuada kas met iti city government.
Innayon na nga agsagana da manen para iti pannakisalip da idiay Thailand intono sumaruno a tawen.
