LAOAG CITY – Kabaelan ti ciudad ti Laoag a magun-od ti herd immunity sakbay ti panagngado ti tawen 2021 kas bilin ni Vaccine czar Secretary Carlito Galvez Jr.
Ummuna iti daytoy, naiyuswat ti virtual meeting a nagatendaran ni Mayor Michael Marcos Keon, Dr. Joseph Adaya iti City Health Office, Sec. Galvez, DOH Sec. Francisco Duque III, DILG Sec. Eduardo Año ken dadduma pay.
Segun kenni Dr. Charito Malicad, ti Information Officer ti lokal a gobierno ditoy ciudad ti Laoag, iti panagsarita da kenni Adaya ket naipasigurado a magun-od ti herd immunity ti ciudad sakbay ti Disyembre 31.
Inlawlawag na a daytoy ket gapo ta nangato ti vaccine acceptance ti ciudad, napintas ti sistema dagiti dua a vaccination site ken panagtultuloy a pannakikoordenar ken panagmonitor ni Mayor Keon.
Kuna ni Malicad nga iti virtual meeting ti nadterminar ti ciudad ti Laoag kas priority LGU a maipaayan ti dakkel a bilang ti bakuna gapo iti alisto met a panagbakuna.
Mainaig iti daytoy, kuna ni Malicad a basar iti datos, addan ti 69 a porsiento ti nakaawat ti frist dose manipud iti target a 75 a ribo nga indibidual tapno magun-od ti herd immunuty.
Adda metten ti 49 agingga iti 55 percent ti fully vaccinated nga indibidual.
Kabayatanna, kinumpirmaran na a naibilin pay a madeterminar dagiti agtawen 12 agingga iti 17 nga agtutubo a target a sumaruno a mabakunaan.
Inbatad na a ditoy ciudad ti Laoag ket umabot iti 7,230 a lallaki ken 7,220 a babbai nga agtutubo ti nadeterminaren ti ciudad ti Laoag.
Patyen met ni Malicad nga 99 percent nga umanamong dagiti nagannak dagiti agtutubo a mabakunaan dagiti annak da.
