LAOAG CITY – Naragsak nga inpakaammo ni Ms. Eva Marie Dumlao, Licensing Officer III iti Business Permit and Licensing Office ditoy ciudad ti Laoag, nadalosanen iti Laoag City Public Market and Commercial Complex babaen ti panagtitinnulong dagiti nagduduma a departamento iti lokal a gobierno ditoy ciudad.
Inbatad na a saan laeng nga iti tiendaan iti nadalosan no di ket pakairamanan iti underpass iti Gilbert bridge.
Kuna ni Dumlao a dagitoy nga aramid ket pakakitaan iti panagkaykaysa tapno ad-adda pay a napinpintas ti buya iti aglawlaw.
Innayon na a ti kangrunana a gagem ti lokal a gobierno ditoy ciudad ket ti panagtalinaed a nadalos ken naurnos iti tiendaan, dagiti kalsada ken dadduma pay.
Kabayatanna, ginutigot ni Dumalo dagiti umili a pagtalinaeden kuma a nadalos iti glawlaw para iti nasalun-at ken naurnos a ciudad.
