LAOAG CITY – Dinepensaan ni lead defense lawyer Nicholas Kaufman ni dati a Presidente Rodrigo Duterte mainaig kadagiti pimmusay iti kangitingitan ti “armed confrontations” iti kampanya kontra illegal a droga.
Inkalintegan ti defense counsel nga inyuswat ti police force ti nasao nga addang kas sungbat da iti agpangpangta a peggad iti biagda kas maiyataday iti rules of engagement a namin-ado a daras nga inbatad ti dati a presidente.
Segun ken ni Kaufman, adda ti existing contemporaneous documents kas ti arrest warrants, operational records ken narekobre dagiti paltog a mangipakpakita a lehitimo dagiti operasyon ti nailian a pulisya a nagtungpal ti sinnukat dagiti putok ti paltog.
Kuna na a ti narekobre a paltog iti nakapasamakan ti krimen ket mangipakpakita nga inusar ti nasao nga armas kontra iti pulis a nagresulta iti panagusar ti pwersa.
Innayon na nga otorisado dagiti operasyon dagiti naisyu a search warrant manipod iti korte.
Dinakamat pay ni Kaufman ti uppat nga indibidwal a naarestar a sibibiag, a nangipakita ti saan a panagusar ti “indiscriminate force.”
Inlanad pay ni Kaufman ti insidente no sadinno nga adda ti gunpowder residue a nadetect iti ima t biktima nga agtugma iti forensic findings a naaddaan ti sinnukat ti putok ken maikontra iti “straightforward execution” narrative.
Inpalgak ni Kaufman a saan a mapaneknekan ti prosekusyon a “planted” dagiti droga ken paltog dagiti biktima isut gapuna a naglikudan da dagiti ebidensiya manipod iti crime scene kagiddan ti panangikalintegan da nga awan ti umdas nga ebidensiya.
Kinontra met ni Kaufman ti panangdependar ti prosekusyon iti “narrow” ken uncorroborated” insider testimony, a mangibagbaga a ti narekobre a paltog ket naimula iti nakapasamakan ti krimen ken fabricated wenno naar-aramid laeng ti official report.
Nupay kasta, segun ken ni Kaufman, basar iti maysa a testigo, inadmitir na a saanna a naimatangan ti panagimula ti bala.
Dinakamat pay ni Kaufman ti insidente a direkta a mangikonkonektar iti dati a presidente basar iti maysa a voice recognition ti maysa nga indibidwal a maipagarop a nangngegan na iti phone conversation ken nabigbig na ti boses ni Duterte.
