LAOAG CITY – Inpetteng ti maysa a nangato nga opisial iti opisina ti Presidente ti Lebanese a ti Lebanon ket makipaset kadagiti direkta a negosasion iti Israel inton sumaruno a lawas no adda ti ceasefire iti lugar.
Daytoy ket kalpasan a pinalubosan ti Prime Minister ti Israel a ni Benjamin Netanyahu ti direkta a panagsinnarita kagiddan iti panangibagana ti paulit-ulit a kiddaw manipud iti gobierno ti Lebanese.
Inbatad ti maysa nga opisial ti United States State Department nga ag-host daytoy ti taripnong inton sumaruno a lawas iti Washington tapno talantanen ti agtultuloy a negosasion iti ceasefire iti nagbaetan ti dua a pagilian.
Agtultuloy ti iwaywayat nga air strike ti Israel iti Lebanon no sadinno nga adda ti 21 nga indibidual ti natay iti kaudian a panangatake idinto a nangiwayat met ti Hezbollah ti naruay a rocket iti sumagmamano a lugar iti Israel.
Segun kadagiti otoridad ti Lebanese a karaman kadagiti pimmusay ti pito a miembro ti agpada a pamilia iti ili ti Abbassieh ken 11 a tattao iti Zrarieh.
Tinamaan met ti maysa a medical center iti Burj Qalaway a nakatayan ti dua nga indibidual idinto a ti maysa a drone strike ket naka-target iti maysa nga ambulansia iti Toul nga awan ti naipadamag a natay.
Basar iti Israel Defense Forces (IDF) a dinadael daytoy ti sumurok-kumurang 10 rocket launchers a naiwayat iti amianan ti Israel.
Nangiwayat pay ti Hezbollah kadagiti rocket iti Israel a nagpatpatnag kangrunaanna iti southern coastal city ti Ashdod ti kaadayoan a na-target ti Hezbollah iti agdama a rinnupak ngem nalappedan daytoy ti Israel Defense Forces.
