LAOAG CITY – Naiget a naglikudan ti kampo ni Senador Ronald “Bato” dela Rosa ti rakurak ti National Bureau of Investigation (NBI) a nangiladawan iti senador kas “armado ken napeggad, kagiddan ti panangilawlawag da a natibker a pagibasaran ti nasao nga alegasyon.
Segun iti abogado ti senador a ni Atty. Israelito Torreon, saan a nainkalintegan ti panangiladawan da iti senador ken saan a makatulong daytoy iti naurnus a panangsolbar kadagiti legal issue a sangsangwen ni dela Rosa.
Inpetteng ni Torreon a ni Senador dela Rosa ket maysa a naelektaran nga opisyal a natanang nga agtigtignay ken sumursurot iti pagrebbengan a kas public servant.
Iti met biang ti National Bureau of Investigation, inpaganetget ti ahensya a paset daytoy ti standard operational protocol kadagiti operasyon kontra kadagiti indibidwal a birbiruken ti linteg.
Nagpanawagan met ti kampo ni Dela Rosa kadagiti otoridad a mangipakita ti pasensya kabayatan nga iyur-uray ti desisyon ti Korte Suprema mainaig iti inpila da a mosyon tapno baliktaden ti immunan a desisyon na a pagkedkedan ti interim relief.
Maipalagip a ni dela Rosa ket adda ti sangsangwen a a warrant manipod iti International Criminal Court (ICC) kalpasan a naestablisar daytoy kas maipagarop a co-perpetrator ni dati a Presidente Rodrigo Duterte iti nadara a kampanya kontra iti ilegal a droga ti napalabas nga administrasyon.
