LAOAG CITY – Nangisayangkat ti City Government ditoy siudad ti Laoag ti Singing ken Poem Competition and Children’s Work Exhibit kas paset iti pannakaselebrar ti 2024 National Children’s Month.
Segun iti lokal a gobierno, daytoy a selebrasion ket maitunos iti Republic Act No. 10661 National Children’s Month (NCM) wenno iti “Buwan ng mga Bata”.
Dinayaw ni Mayor Michael Marcos Keon ti dedikasion dagiti Day-care Workers ken impaganetgetna ti napateg nga akemda iti panangaywan kadagiti ubbing ti siudad.
Kinuna pay ni Keon a dagiti ubbing ti masakbayan ditoy siudad, rason nga agtultuloy ti panagtrabaho ti Sangguniang Panlungsod, City Social Welfare and Development Office, ken Local Finance Committee tapno agbirok iti wagas tapno ad-adda a mapasayaat ti kasasaad dagiti agtutubo ditoy siudad.
Kabayatanna ti National Children’s Month (NCM) ket maselselebraran tunggal bulan ti Nobiembre tapno masustiner ti pannakaitandudo ken pannakasalaknib kadagiti karbengan dagiti ubbing.
