LAOAG CITY – Inpakaammo ni Mrs. Marlene Febes Peralta, Assistant Regional Director ti DSWD Field Office 1 nga iti LGUs babaen iti MSWDO ti pakaiyuswatanen ti initial assessment kadagiti agkalikagum a manggundaway ti education assistance ken ti DSWD office ti mangipinal ti listaan dagiti kwalipikado.
Segun ken ni Peralta, dagiti kwalipikado ken kompleto ti requirements na ti mapatuludan ti mensahe pakaseknan ti pay-out a maiyuswat laeng iti kada sabado.
Immuna iti daytoy, inlawlawag ni Peralta a dagiti saan a naited ti education assistance na idi umuna a sabado ti pay-out ket nakolektar ti dokumento da.
Inbatad na a dagitoy ti karaman iti maikadua a pay-out idi kalman.
Kabayatanna, kuna ni Peralta a a masapol nga urayen ti mensahe nga ipatulod ti DSWD sakbay nga agturong iti opisina para iti pay-out.
Inbunannag na nga addan ti memorandum of agreement iti nagbaetan ti DILG ken nagduduma nga LGUS pakairamanan ti DSWD tapno tumulong iti assessment.
Iti agdama, inpakaammo ni Peralta nga addan nasurok 10,500 a benepisyaryo ti nakaawat ti education assistance iti intero a rehiyon uno.
Maipalagip a naruay latta dagiti nagturong iti opisina ti DSWD iti maikadua a sabado ti pay-out ken kaaduan ket walk-in.
Sumagmamano kadagiti nagturong iti nasao nga opisina partikular ditoy siudad ti Laoag ket naggapo iti adayo nga ili ken napaay da laeng.
Rumrumuar nga awan met ti naipadanon iti pakaibilangan nga LGU dagiti maseknan mainaig iti pannakikoordinar da iti DSWD.
