LAOAG CITY –Isingsingasing ni Senador Lito Lapid ti maysa a gakat a mangipaay ti libre nga executive checkup para kadagiti nakurapay a senior citizen iti pagilian.
Iti babaen ti Senate Bill No. 2433, maipaayan ti libre ken komprehensibo a panag-checkup dagiti Pilipino nga agtawen ti 60 agpangato a maibilang kas indigent ti siudad wenno ti Municipal Social Welfare and Development Office (C/MSWDO).
Dagitoy ket pakairamanan ti kompleto a serbisio tapno maagasan ti sakit a pakairamanan ti;
Konsultasion iti doctor ken espesyalista;
Laboratory tests kas ti blood chem. urinalysis,ken X-ray; ken
Dadduma pay a diagnostic ken screening procedure para iti nasapa apannakaduktal ti sakit kas ti high blood, diabetes, sakit iti puso, ken dadduma pay.
Segun iti gakat, maipaay daytoy kadagiti pampubliko nga ospital, DOH hospital, Rural Health Units (RHU), ken kadagiti pribado nga ospital nga accredited ti gobierno.
Maipatungpal daytoy ti maminsan iti kada tallo a tawen para iti tunggal benepisiario, ken maipaayan ti prioridad dagiti bedridden, ken dagiti agnanaed iti adayo a lugar a masansan a saan a makadanon ti serbisio medikal.
