LAOAG CITY – Kinumpirmaran ni Police Chief Inspector Marlon Padamada, ti chief of police iti Pasuqun, Ilocos Norte ti boluntaryo nga isusuko ti sumagmamano a miembro ti maysa a pamilya a taga Barangay 4 iti nasao nga ili.
Nabigbig dagitoy a da Von Ryan Nagasangan y Valdez, agtawen iti 40, awanan ti asawa, negosyante; Joy Nagasangan y Valdez, agtawen iti 45, awanan ti asawa, businesswoman, Norman Nagsangan y Valdez, agtawen iti 49, naasawaan, inhinyero; Irenea Nagasangan y Valdez, agtawen iti 77, balo ken ni Prisely Nagsangan y Faigman, agtawen iti 49, naasawaan ken housekeeper, agpapada dagitoy a residente ti nasao a barangay.
Inbatad ni Padamada a kalpasan nga adda ti inparuk-at a warrant of arrest si Hon. Judge Nida Alejandro ti RTC Branch 12 ditoy ciudad ti Laoag ket nagturong a dagus dagiti suspek iti PNP-Pasuquin tapno agpiyansa da iti sangsangwen da a kaso nga anti-cyber crime law.
Inlawlawag ni Padamada a ti naipila a reklamo kontra kadagiti suspek ket adda ti maipagarop a pakainaigan na ti negosyo da a call center ken internet cafe ditoy ciudad ti Laoag ken adda pay idiay Manila a dagiti complainants ket gangannaet.
Nupay kasta, saanen a nakaited ti naan-anay a detalye ni Padamada no ania ti nangrugyan ti kaso.
Temporaryo met laeng a nawaya-wayaan dagiti suspek kalpasan a nakapagpiyansa da iti sa-100 a ribo a pisos.
