LAOAG CITY – Balligi dagiti lima nga estudyante iti Sarrat National High School iti nakisalipan da a Hong Kong International Mathematical Olympiad (HKIMO) – Final Round a naangay manipud Agosto 25 agingga iti Agosto 28 idiay Hong kong.
Umabot iti 17 a pagilyan manipud iti Asia, Europe, Africa ken Oceana ti kinalaban dagiti estudyante manipud ditoy probinsya.
Iti Secondary 1 (SPM Grade 7), naiyalat ni Brian Jansen Vallejo ti Gold Award iti World Champion in Secondary 1, ken World Star no sadinno isuna ti Top Scorer iti Philippine Team.
Gold Award met ti naala da Allen Iver D. Barroga ken Natalie Margaret Balisacan iti World 1st Runner Up in Secondary 1, ken ti coach dagitoy ket ni Mr. Michael Malvar.
Iti met Secondary 2 (Grade 8), Gold Award met laeng ti naala ni Zyrene Angelica Concepcion Dulluog iti World 1st Runner Up in Secondary 2, ken ti coach na ket ni Dr. Agnes Compa Calilao.
Iti Senior Secondary (Grade 10), Gold Award met laeng ti naiyalar ni Ma Cassandra Duque ken ni Mr. Jenifer Jb Balisacan ti coach na.
Mainaig iti daytoy, kalpasan ti balligi da ket saganaan da met ti sumaruno a pannakisalip da iti World International Mathematical Olypiad intono Disyembre ita a tawen idiay Hanoi, Vietnam.
