LAOAG CITY – Naarestar dagiti lima nga indibidual gapu iti panagsusugal iti maysa a minatayan iti Brgy. 20, San Jose iti ili ti Sarrat.
Segun ken ni P/Cpt Kester Arellano, chief of police iti Philippine National Police iti ili ti Sarrat, nabigbig dagiti suspek nga agtawen ti 38, awanan trabaho, residente iti Brgy. 22, San Cristobal, agtawen iti 59, mannalon, residente Brgy. 21, San Marcos, agtawen iti 60, driver, residente iti Brgy. 21, San Marcos, agtawen ti 31, mannalon, residente iti Brgy. 19, Sto. Tomas ken Sarat, ken agtawen ti 39, self-employed, residente iti Brgy. 22 San Cristobal iti nadakamat nga ili.
Inbatadna a natiliw dagiti nasao a suspek babaen iti naiwayat nga Anti-Illegal Gambling Operation no sadinno a naaktuaranda nga agsusugal ti Lucky 9 .
Nupay kasta, ado dagiti nagsusugal iti nadakamat a minatayan ngem nakataray dagitoy.
Nakumpiskar manipod kadagiti suspek ti gatad a nasurok P12,000 a nausar kas pusta iti panagsusugal dagitoy.
Kabayatanna, nagpalagip ni Arellano kadagiti residente a summurot iti paglintegan tapnu saan a mapsamak ti kapada nga insidente.
