LAOAG CITY – Inbatad ni Senador Sherwin Gatchalian a saan nga amin a Pilipino ti makaawat iti cash assistance babaen ti nailungalong a Bayanihan 3 Act.
Segun iti Senador, mangilatang ti gobierno iti P98 billion agingga iti P406 billion a gagem na a matulongan dagiti Pilipino a nakaro a naapektaran iti panagngato ti presio ti langis.
Nupay kasta, inlawlawag ti senador a dagiti laeng maikkan iti nasao a programa ket manipod kadagiti sektor a maibilang nga alisto a maapektaran.
Karaman ditoy dagiti mannalon, mangngalap, ken dagiti makunkuna a “bottom 30 percent” wenno dagiti nakurapay a sektor ti komunidad, kasta met ti sektor ti transportasion.
Kuna na pay a manamnama a makaawat dagiti kwalipikado a benepisyario manipud iti P1,500 agingga iti P3,000 wenno P4,000, depende iti mapaspastrek da.
Kabayatanna, inpila ni Senador Loren Legarda ti Bayanihan Power to the People Act wenno Bayanihan 3, a panggepna nga agaramid ti wagas iti gobierno tapno mataming ti epekto ti global oil crisis kadagiti pagtaengan ken ekonomia ti pagilian.
Inlawlawag ni Gatchalian nga adda ti tallo a paset ti gakat no sadinno a ti umuna ket pamaestablisar ti pagtaudan ti pondo, karaman ti possible a pannakailatang manen ti urnong ti gobierno, kas iti naaramid iti naglabas a pandemia.
Maikadua, ti makunkuna a “pump priming” wenno panagisagana iti pondo no bilang kumapuy wenno mapasamak ti stagflation ti ekonomia, ken maikatlo, panangipaay iti subsidio wenno direkta a tulong kadagiti kualipikado a benepisiario.
Innayon ti senador a maad-adal pay ti posibilidad a maited ti nayun a relief kas iti temporary moratorium iti panagbayad kadagiti obligasion kadagiti ahensia ti gobierno kas iti Social Security System ken Government Service Insurance System, kasta met dagiti dadduma pay a financial institutions ti gobierno.
