LAOAG CITY – Naiyalud-od ti lockdown iti Barangay 32-C, Lapaz ditoy ciudad ti Laoag kalpasan nga adda pay dagiti saan a natrace a nakapulapol dagiti nagpositibo ti covid-19 iti nadakamat a barangay.
Immun-una iti daytoy, kinumpirmaran ni Barangay Kagawad Nestor Antonio, iti Brgy. 32-C Lapaz nga adda dagiti saan a natrace a maibilang a secondary contact dagiti nagpositibo ti COVID-19 iti nasao a barangay iti kallabes.
Segun kenni Antonio, naipatungpal ti pannakaiyalod-od ti lockdown tapno maisolate dagiti dadduma a naapektaran a residente.
Inpasingked na nga adda met ti pondo ti barangay ken adda ti ipaay ti lokal a gobyerno a kasapulan dagiti naapektaran a residente.
Inadmitir ni Antonio a saan a makaumanay ti pondo ti barangay para iti pannakaipaay ti tulong kadagiti kabarangayan na.
Maipalagip a nagpositibo iti COVID-19 ni IN-C117, lalaki, agtawen ti 36, aglaklako ti ikan ken residente iti Brgy. 32-C Lapaz ditoy siudad ti Laoag idi Setyembre 29, basar iti naipost iti Facecook page ni Gov. Matthew Marcos Manotoc.
Simmaruno a nagpositibo da IN-C121, babai, agtawen ti 31 kenni IN-C122, lalaki, agtawen ti 36 ken agpada a nakapulapol ni IN-C117.
