LAOAG CITY – Inbasura ti Court of Appeals 3rd Division ti petisyon ni dati a Negros Oriental congressman Arnolfo Teves Jr. a mangkweskwentyunar ti maipagarop a grave abuse of discretion ni Manila RTC Branch 12 Judge Renato Enciso mainaig ti search warrants idi 2023.
Ti petisyon ket mainaig iti search warrants para kadagiti paltog, bala, ken explosives nga inisyu idi 2023 kontra ken ni Teves ken kadagiti annak na a da Kurt Matthew ken Axl.
Inpetteng ni Teves a nagkamali ti korte gapu ta maipagarop a saanna a pinaawan bileg ti search warrants ken saanna pay a linapdan ti panagusar kadagiti naala nga ebidensya.
Kwinestyunaran na pay ti testimonya dagiti testigo, karaman ti maysa nga STL collector ken maysa a pulis a maipagarop nga awan ti personal nga ammo na kadagiti armas.
Nupay kasta, inrakurak ti Court of Appeals a napaay ni Teves a paneknekan ti naiget a panagkamali ti korte ken awan ti nakita na a gross misapprehension of facts.
Basar iti korte, nasurot ti umiso a proseso iti panagala ti testimonya ken legal ti sakopen ti search iti intero a pagtaengan.
Gapu iti daytoy, pinaboran ti Court of Appeals ti bisa ti search warrants ken ibilangna a legal dagiti nakumpiskar nga armas ken ebidensya.
Maipalagip a sumangsango pay no Teves iti kaso a multiple murder mainaig iti pannakapapatay ni dati a Negros Oriental Governor Roel Degamo ken siyam a sabsabali pay.
Iti agdama, nakabalud ni Teves iti Metro Manila District Jail (MMDJ) iti Camp Bagong Diwa, Taguig City kabayatan a maus-usig iti kaso na.
