LAOAG CITY – Target ti Land Transportation Office (LTO) a maipababa iti 35 a porsiento dagiti mapaspasamak a road crash ken road rage incidents iti Pilipinas ita a tawen.
Daytoy ti inrakurak ni Land Transportation Office – Regional Director Glorioso Daniel Martinez iti baet a bimmaba dagiti road crash incidents babaen ti ipapatungpal da a libre a Theoretical Driving Course (TDC).
Inbatad ni Martinez a ti kangrunaan a makaigapu no apay nga adda dagiti mapaspasamak a road crash incidents ket ti human error.
Inlawlawag ni Martinez a ti makunkuna nga human error ket kinakurang ti ammo dagiti road users wenno driver iti panagusar ti lugan ken panagusar iti kalsada.
Mainaig iti daytoy, kuna ni Martinez a saan dan a kamaten wenno pagsungbaten dagiti ignorante iti panagusar ti lugan wenno kalsada no di ket ti laengen aramiden da ket pukawen ti kina-ignorante.
Kabayatanna, inpanakkel ni Martinez a ti napintas nga epekto ti libre a Theoretical Driving Course ket maipatpatungpal da ti Persuasive Type of Enforcement.
Innayon na a babaen iti Persuasive Type of Enforcement ket masursurwan dagiti umili no ania dagiti paglintegan ken no sumurot da iti linteg ket sigurado a bumaba ti bilang dagiti matmatay gapu iti nakaro a disgrasya iti kalsada.
