LAOAG CITY – Inpakaammo ni Engr. Glenn Miguel, District Engineer ti Department of Public Works and Highways – First District Engineering Office ditoy siudad ti Laoag a dua ti mapasayaat wenno ma-improve a section iti maaramid a kalsada iti likod ti SM ditoy siudad ti Laoag.
Segun kenkuana, daytoy ket ti mapagbalin a semantado iti sibubukel a kalsada iti likud ti dakkel a mall ditoy siudad a mamagkamang iti Gilbert Bridge ken bypass road pakairamanan ti naan-anay a pannakapasayaat ti slope protection iti dike.
Inbatadna a daytoy a pannakaaramid ti kalsada ket isu ti agbalin nga exit route dagiti mapan agpasiar iti nasao a dakkel a mall.
Mainag iti daytoy, kunana a kinasaritana pay ti pannakabagi ti dakkel a mall gapu ta kayatda a maiggidan koma ti pannakalpasna iti nasao kalsada ken ti panaglukatna daytoy.
Nupay kasta, kunana a saan a maikamat a maigiddan gapu ta ti daddumana a pundo ket kaaw-awatda laeng idi bulan ti Marso.
Kabayatanna, inpanamnama ni Engr. Miguel nga aramidenda ti amin a kabelanda tapno malpas nga insigida iti nasao a kalsada.
