LAOAG CITY – Kiniddaw ni President Andry Rajoelina ti pannakaipaay kenkuana ti maysa a tawen a mangsolbar kadagiti sangsangwen na problema ti Madagascar kas iti kinakurang ti supply ti kuryente ken danom a nangitunda ti panagprotesta dagiti naruay nga umili aglalo dagiti agtutubo iti nagduduma a paset ti pagilian.
Inkarina a no saanna a masolbar amin dagiti sangsangwen a karit ti pagilian ket bumaba iti pwesto na.
Inrakurak daytoy ti presidente kabayatan ti panakitaripnong na kadagiti nagduduma a grupo a mangsupsuporta ti gobierno iti mismo a palasyo.
Kabayatanna, agtultuloy ti tignay protesta iti Madagascar ken agpanpanawagan dagiti protesters a masapol a bumaban iti pwesto ti presidente.
Naimbitaran na met dagiti lider dagiti protesters tapno makipaset iti naiwayat a taripnong ngem nagkedked dagitoy gapu ta ipetpetteng da a saanda a kayat ti makidayalogo iti gobierno a maglaplapped kadakuada a mangilaban ti karbengan da.
Maipalagip nga iti napalabas a lawas ket inikkat ni Presidente Rajoelina ti sibubukel a gobierno na ken dinutukan na ti army general kas prime minister.
Nangrugi a nagturay ni Rajoelina idi 2009 kalpasan nga indaulwan na ti mass protests a nangresulta ti pannakiballaet ti military ken pinadisi da iti pwesto ni President Marc Ravalomanana.
