LAOAG CITY – Inpetteng ti Barangay Kagawad Angel Baradi iti Brgy. 17 San Felipe ti ili ti Sarrat a saan nga agpirma ti dokumento para iti pananggatang ti materyales ti nadadael nga multicab ti barangay.
Daytoy ket gapu iti maipagarop a kwestyunable a nailanad a presio dagiti magatang wenno nangina daytoy ken patien na nga adda ti anomalya na iti daytoy.
Segun kenni Baradi, saan saan nga usto ti detalye ti pappapirmaan da kenkuana a purchasing paper.
Basar iti purchasing paper a pappapirmaan da kenkuana, 6,500 pesos ti balor ti baterya, 5,500 pesos ti starter ken 50 pesos ti fuel filter, no sadinno agdagup amin dagitoy ti 12,050 pesos.
Kunana a gapo iti saan na a panagpirma ken dagiti kakadua na pay a kagawad ket maipagarop a maluksaw ni Kapitan Glenda Tamayo.
Inbatad na a basar iti palawag kenkuana ti kapitan ket nairaman ti labor wenno ti bayad ti agtarimaan ngem saan inpetteng na a saan a mabalin daytoy gapo ta masapol a mailanad latta ti usto a presyo ti magatang a materyales.
Dinakamat pay ni Baradi no apay nga iti talyer iti Braangay 15 ti nangipanan da iti multicab gapo ta masapol ti resibo.
Malaksid iti daytoy, kwinestyunaran pay ni Kagawad Baradi ti mailatlatang a 5,698 pesos a pondo para iti krudo ti multicab iti laksid a daytoy ket adda iti talyer ken saan met a maus-usar.
