LAOAG CITY – Kinumpirmaran ni Governor Matthew Marcos Manotoc ti kaadda manen ti baro a kaso ti covid-19 ditoy Ilocos Norte, kalpasan ti agarop dua a bolan a panagbalin a covid-19-free ti probinsya.
Iti inparuk-at nga statement ti gobernador, inbaga na a ti maikatlo a kaso ti covid-19 ditoy probinsya ket maysa nga agtawen ti 41 a babai a taga Brgy. San Nicolas, Vintar, Ilocos Norte ken Overseas Filipino Worker manipod iti United Arab Emirates (UAE).
Naipan ti pasyente iti Vintar Quarantine Facility idi Mayo 30 ita a tawen para iti mandatory quarantine.
Idi Hunyo 15 ket dimmalan ti swab test ti pasyente ken rimuar ti resulta na idi kalman Hunyo 16 ket positibo daytoy.
Gapu iti daytoy, naipatungpal ti lockdown iti quarantine facility a nagtalinaedan ti pasyente.
Naiget met ti panangmonitor ti gobierno probinsyal, Department of Health ken ti local a gobierno iti ili ti Vintar kadagiti dadduma pay a nai-quarantine iti lugar ken dagiti nakapulapol ti pasyente sipud simmangpet ditoy probinsya.
Gapu iti daytoy, immapela manen ti gobernador ti kooperasyon ti publiko tapno maliklikan ti panagwaras ti virus ken masapol nga itultuloy ti panagusar ti face mask, kanayun a panagugas ti ima ken social distancing.
Kuna pay ti gobernador nga ad-adda a mapaigetan ti border protocol, maiquarantine amin a sumrek ditoy probinsya, ken maipatungpal ti strategic ken targeted testing.
