LAOAG CITY – Inpanakkel ni House Deputy Minority Leader ken Mamamayang Liberal Partylist Rep. Leila de Lima a ti maikatlo nga impeachment complaint a naipila kontra ken ni Vice President Sara Duterte ket ad-adda a napasayaat a bersyon dagiti artikulo a naipatulod idi iti Senado iti napalabas a Kongreso.
Segun ken ni De Lima, sinuportaran na ti reklamo kalpasan a tiningiting na ti linaon ken dagiti nailanad nga ebidensya, ken agtalek a maipasa daytoy kadagiti proseso iti kamara de representantes.
Karaman kadagiti ebidensya ket dagiti video ti maipagarop a pangta kontra ken ni President Ferdinand Marcos Jr, 1st lady Liza Araneta-Marcos ken dati nga Speaker Martin Romualdez, dagiti audit findings, liquidation vouchers, legislative records, ken sinapataan a palawag mainaig ti maipagarop a panagabuso iti confidential funds iti Office of the Vice President ken ti Department of Education.
Indatag pay ni De Lima ti agbalin a proseso ti reklamo iti Kamara de representantes, manipod iti transmittal ti Office of the Secretary General, panangikabil iti Order of Business, panangtratar iti Rules Committee, agingga iti pannakai-refer na iti House Committee on Justice.
