LAOAG CITY – Inballaag ni House Deputy Minority Leader ken ACT Teachers Party-list Rep. France Castro ti risgo a mabalin nga itunda ti mailunglungalong a temporario a pannakawaya-waya ni dati a Presidente Rodrigo Duterte manipud iti detention facility ti International Criminal Court.
Inlawlawagna a sadinoman a suli ti lubong ti pangikabilan iti dati a Presidente ket agtultuloy a mapangtaanna dagiti biktima ken saksi kadagiti naaramidna a krimen.
Inbatadna a no nakaruar iti pagbaludan ket maikkan ti gundaway ni Duterte a mangiwaras kadagiti biddot nga impormasion a makaapektar iti proceddings ti International Criminal Court.
Mainaig iti daytoy, nagpanawagan ni ACT Teachers Party-list Representative-elect Antonio Tinio kadagiti bikitma, human rights organizations ken dagiti mangilunglungalong ti hustisia nga aktibo a lappedan ti petision para iti temporario a pannakawaya-waya ni dati a Presidente Duterte.
