LAOAG CITY – Maipanggep iti pulitika manen ti rason a pannakaitantan ti pannakaaprobar ti Annual budget iti ili ti Solsona.
Daytoy
ti pannirigan ni Mayor Joseph de Lara iti nasao nga ili kalpasan a
naamwan na ti saan a pannakaaprobar ti budget para ti tawen 2020.
Immuna iti daytoy, kuna ti mayor nga idi kuma pay laeng bulan ti Setyembre a natratar daytoy ken nabayagen a naaprobaran ti Annual Investment program a nakaipalaonan dagiti nagduduma a programa ken tulong a maipaay kadagiti umili.
Inbatad ni de Lara awanen ti rumbeng nga amwen dagiti kameng ti konseho gapu ta naisumitiren ti Annual Investment program.
Segun kenni de Lara, marebisar laeng kuma ti programa no anya dagiti banag a mabaliwan.
Kuna na a kitaen kuma dagiti maseknan ti pagsayaatan dagiti umili iti benneg ti salun-at, barangay, dagiti tulong pinansyal kadagiti mannalon ken dadduma pay.
Innayon ni de Lara nga agrigat dagiti umili agraman dagiti mangop-opisina no saan a maaprobaran ti annual budget ken saan na basol no saan a maipasa ti budget gapu ta inaramid na met dagiti pagrebbengan na.
Umabot ti nasurok 134 a milyon a pisos ti nailungalong a pondo ti nasao nga ili.
