LAOAG CITY – Inpetteng ni Mr. Jeremiah Magaoay, ti maysa kadagiti maitudtudo a suspek iti pannakatay ni Bernie Magaoay a naminsan na laeng a dinanog ti biktima.
Inbatad na nga idi rabii ti Hunyo 2 ket innem da nga aggiinom iti sango ti pagtangen da ken dita met a limmbas ni Bernie a nabartek ken nairana nga agkakatawa da.
Kuna na a dita a simmalangad ni Bernie ken dinamag daytoy nu apay a makatkatawaan kageddan ti panangkarit na kadakuada.
Inbatad na a saan nga isu ti pagkakatawan da ken daytoy ti inlawlawag ti manaong na a ni Jexter ngem maipagarup nga agkakaalas a sarita ti insawang ni Bernie nu sadino a nadakamat na ti “Demonyo ken Satanas.”
Inbunannag ni Jeremiah a gapu iti sakit ti nakem na a nakanggeg ti agkakaalas a sarita ket nadanog na ni Bernie ngem naminsan laeng ken awan met ti panangdangran ti kabsat na iti biktima.
Inpetteng ni Jeremiah nga iti panangdanog na iti biktima ket awan met ti inaramat na a kas iti knuckle nga atapen ti ama ti pimmusay a ni Bernie.
Immuna iti daytoy, inpakaammo ni Jeremiah nga iti isu met laeng nga aldaw a napasamak ti insidente ket naamoan da a naggapo iti paggi-inoman ti biktima ken nadesgrasya gapu iti pannakadungpar na ti aso.
Gapu iti daytoy, patien ni Jeremiah a ti pannakadesgraysa ti biktima ket isu ti rason a nagsagaba ti sugat iti ulo ken saan a ti panangdanog na gapu ta naminsan laeng nadissoan na.
Kuna ni Jeremiah nga iti agdama ket immadayo da iti pagtaengan da gapu iti naruay a pangta a maaw-awat da.
Kabayatanna, inlawlawa na a nu aniaman ti pangeddeng ti pamilya ken ti linteg kenkuana ket nakasagana a mangsango iti daytoy.
Dimmawat met ti pammakawan ni Jeramiah iti biktima kasta met iti pamilya daytoy gapu ta saan na nga ingagara ti napasamak nangruna iti pannakatay ti kabagyan da.
