LAOAG CITY – Agtalek ni House Majority Leader Mannix Dalipe a mapatibker ti kooperasyon ti dua a pagpandayan linteg iti kongreso iti legislative process iti panagtugaw kas baro a Senate President a ni Senador Chiz Escudero.
Segun ken ni Dalipe, namnamaen nga agbalin ton a patas ti Senado ken Kamara de representantes kangrunaan na dagiti prayoridad ti Legislative-Executive Development Advisory Council wenno LEDAC.
Inbatad na a napateg ti panangidaulo ni Escudero iti pannakatratar kadagiti gakat a tulbek iti ad-adda pay a panagdur-as ti pagilian.
Mamati pay ni Dalipe a maaddaan ti produktibo a kolaborasyon iti Senado kalpasan a naelektaran ni Senador Francis Tolentino kas Majority Leader.
Innayon na a magagaranen a makatrabaho na ni Tolentino tapno mailungalong dagiti gakat kagiddan ti panangnamnama na nga iti babaen ti liderato ni Escudero ket maipatungpalen ti economic Charter Change.
Kabayatanna, mamati met ni Kabataan Party-list Representative Raoul Manuel a ti gagem ti panagsukat ti liderato iti senado ket tapno mapagbalin a basbassit dagiti kakampi dagiti Duterte a mangmanipular iti uneg ti kongreso.
Kinarit na met ni Escudero a denggen dagiti panawagan ken naan-anay nga ibasura ti constitutional reform ken ti Mandatory Reserve Officers’ Training Corps (ROTC).
