LAOAG CITY – Inlungalong ni House Majority Leader Ferdinand Alexander Marcos ti gakat a mangipaay ti libre a kuriente kadagiti pamilia a nababa ti konsumo ti kurientena.
Iti babaen ti House Bill No. 2700 wenno “Free Electricity for Low-Consumption Households Act,” baklayen ti gobierno ti sibubukel a gastosen iti kuriente dagiti kualipikado nga umili.
Saan a mapatawan ti 12% VAT ti subsidiya nga ipaay.
Sakupen ti gakat dagiti pagtaengan nga agus-usar ti saan a lumabes iti 135 kilowatt-hours (kWh) iti kada bulan wenno adda ti bayadan a saan a sumurok iti P2,000, aniaman ti nababbaba.
Kasapulan daytoy a paneknekan ti Energy Regulatory Commission ken Department of Energy.
Gagem ti gakat a sukatan ti agdama a sistema ti lifeline rate no sadinno sabali a konsyumer ti mangibakbaklay iti subsidiya dagiti marigrigat.
Iti baro a sistema, direkta nga aggapun iti gobierno ti pundo tapno agbalin nga ad-adda a patas ken nalawag ti panangipaay ti tulong.
Mangiyisyu ti zero-charge bill dagiti distribution utility kadagiti kualipikado a benepisiario ken mangisubmitir ti reimbursement iti Department of Energy a dumalan iti audit ti Commission on Audit.
Kabayatanna, kuna ni Majority Leader Sandro Marcos a pinasimple metten ti aplikasion iti Lifeline Rate Subsidy Program tapno ad-adu a marigrigat a pamilia ti mabenepisiaran.
