LAOAG CITY – Kinondenar ti India ti panangatake iti maysa nga Indian-flagged cargo ship iti kabaybayan ti Oman kalpasan a naarinebneb daytoy gapu iti maipagarup a missile strike.
Basar iti India’s Ministry of External Affairs, inawaganna a saan a nainkalintegan ti insidente ken binabalawna ti agtultuloy a panag-target iti commercial shipping ken kadagiti sibilian.
Kinumpirmaran ti India a natalged ti amin nga Indian crew members a nakalugan ti barko kalpasan a naisalakan isuda dagiti otoridad ti Oman.
Segun iti maritime security firm, ti barko a karaman ket nabigbig nga MSV Haji Ali, maysa a cargo vessel nga adda ti 14 a tripulante ken adda ti kargana a livestock manipud Berbera iti Somaliland nga agturong iti Sharjah, United Arab Emirates.
Naammoan a naaddaan ti napigsa a panagbettak iti barko nga asideg iti kabaybayan ti Limah, Oman iti Strait of Hormuz gapu iti maipagarup a missile strike.
Saan pay nga innaganan ti India no asino ti posible a responsable iti panangatake.
Nagpanawagan ti New Delhi a nasken a liklikan ti panangatake iti commercial vessels ken aniaman nga addang a makalapped iti freedom of navigation ken world business.
