LAOAG CITY – Sabali manen a bomb threat ti naawat ti Mariano Marcos State University (MMSU) Batac Campus isut gapo na a napagawid a dagus dagiti estudyante.
Naipalaon iti mensahe a ti bomba ket maipagarop a naimula iti College of Engineering ken daytoy ket gapo iti agtultuloy a panangsuporta kenni Pres. Bongbong Marcos Jr.
Nangipatungpal met a dagus ti ocular inspection dagiti kameng ti Philippine National Police ken ti K9 Units iti Ilocos Norte Police Provincial Office iti nadakamat nga unibersidad.
Segun kenni Dr. Julius Manzano, maladingitan gapo ta kastoy ti mapaspasamak iti unibersidad gapo ta makatubeng iti panagbasa ken panagtrabaho da.
Inlawlawag na a napagnunumoan da a mangaramid da ti unified framework tapno mapadur-as pay ti kapabilidad da a mangdeterminar no siasinno dagiti agipatpatulod ti mensahe.
Kunana pay nga addan to ti panagtataripnong da kadagiti regional experts, national experts, internet providers ken dadduma pay tapno alisto a maamoan no siasinno ti akin-aramid iti daytoy.
Inbatad na nga awan pay ti lead da no siasinno dagiti agipatpatulod ti mensahe nangruna ket madiskarte dagiti maseknan.
Daytoyen ti maikanem a bomb threat a naawat ti unibersidad sipud idi tawen 2024.
Kabayatanna, gapo iti sabali manen a bomb threat ket nangiyetnag ti memorandum ni Manzano nga online class pay laeng ti maipatungpal agingga intono Biyernes ngem kadagiti laboratory classes ket ummuna a mangiyuswat ti panel wenno panangkita iti pasdek dagiti otoridad sakbay a mangrugi ti klase.
Maipalagip nga inbatad ti unibersidad a mangbukel ti cyber security team tapno al-alisto a madeterminar no nagapuan dagiti naipatulod a messages iti nasao a unibersidad kalpasan dagiti naawat da a nagsasaruno a bomb threat.
