LAOAG CITY – Ginutigot ti Palasyo ti Malacañang ni Senador Ronald “Bato” dela Rosa nga agpakita ken sangwen na dagiti kaso kontra kenkuana.
Iti maysa a press briefing, inbatad ni Palace Press Officer ken Communications USec. Claire Castro a kas dati a nagserbi nga hepe ti nailian a pulisya, masapol nga ammo ni dela Rosa nga adda ti may valid warrant of arrest nga inisyu ti International Criminal Court (ICC) ken no awan ti basol na ket rumbeng a rumuar.
Nagballaag met ti Palace official a no gandaten ni dela Rosa ti aglibas iti pagilian, maarestar daytoy basar metlaeng iti Department of Justice.
Segun pay ken ni USec. Castro, respetaren ni Presidente Ferdinand Marcos Jr. ken ti administrasyon ti nakapenpen a kaso ti senador iti Korte Suprema ngem saan a kasapulan nga aglibas ti senador a rumuar iti pagilian.
Iti agdama ket kadwa ni dela Rosa iti listaan ti wanted persons ti International Criminal Court mainaig iti crimes against humanity nga adda ti koneksyon na iti drug war ti Duterte administration.
