LAOAG CITY – Inpannakkel ti Malacañang dagiti addang ti administrasion ni Presidente Ferdinand Marcos Jr. kontra iti korapsion nangruna kadagiti adda ti pakainaiganna iti maanomalya a flood control projects.
Basar iti Presidential Communications Office (PCO), personal nga indauluan ti Presidente ti panangibutaktak ken panangimbestigar kadagiti proyekto nga addaan ti iregularidad no sadinno a sumagmamano kadagitoy ket naduktalan a substandard idinto a dagiti dadduma ket saan a naipatungpal.
Inpetteng ti Palasyo a ni Presidente Marcos ti immuna a lider a nangibutaktak ti maanomalya kadagiti nagduduma a paset ti pagilian.
Karaman kadagiti addang ti gobierno ti panangirubuat ti “Sumbong sa Pangulo” website, panangbukel ti Independent Commission for Infrastructure (ICI) ken ti Transparency Portal ti Department of Public Works and Highways (DPWH) tapno papigsaen ti panagbantay ken panangsungbat kadagiti proyekto ti gobierno.
Kuna ti Malacañang, in-inuten a maipaspasubli dagiti pundo a tinakaw ken naminsan manen a nailatang ti flood control budget iti ad-adda a napateg a programa.
Inpasigurado ti Palasyo nga agtultuloy ti panangkamat kadagiti karaman agingga a mapagsungbat dagitoy iti linteg.
