LAOAG CITY – Iyur-uray laengen ti Malacañang ti agbalin a desision ni Senate President Chiz Escudero no ipa-subpoena ti sumagmamano a miembro ti gabinete tapno agatendar iti panagdengngeg ti Senado mainaig iti pannakaarestar ni dati a Presidente Rodrigo Duterte.
Inbatad ni Palace Press Officer Claire Castro, manarimaan pay laeng a maad-adal daytoy babaen ti legal department ti Senado.
Inlawlawagna nga iti kanito a rummuar ti subpoena ket ditoy laeng a sungbatanna no agatendar dagiti naimbitaran nga opisial.
Inpasigurado ni Castro a sumurotda no ania ti naiyataday iti linteg.
Maipalagip nga inkalintegan ti Malacañang a nasungbatanen dagiti opisial dagiti saludsod iti umuna a panagdengngeg iti Senado.
Inpetteng met ni Executive Secretary Lucas Bersamin adda ti panagdengngeg a saanen a sakupen ti executive privilege isu a saanen nga agatendar ti sumagmamano nga opisial ti ehekutibo.
