LAOAG CITY – Kinarit ti Malacañang dagiti mangitudtudo ken ni Presidente Ferdinand Marcos Jr. a mangidatag ti ebidensa ken saan a kanayon nga alegasion.
Daytoy ket kagiddan ti testimonia iti Senado ni Bernard Tube a nagpabigbig a dati a marine ken dati nga empleado ni Zaldy Co.
Inbatad ni Tube a naminsan daytoy a nangipatulod kadagiti maleta a naglaon ti kuarta iti maysa a pagtaengan iti Paoay, Ilocos Norte.
Kuna ni Palace Press Officer ken Presidential Communications Office Undersecretary Claire Castro a saan nga umdas dagiti pammabasol no awan met ti maipakita a nadagsen a pammaneknek.
Inpettengna nga alisto ti agpabasol nangruna no ti gagem ken perdien wenno ririboken ti gobierno.
Gapu iti daytoy, inallukoyna dagiti mangiparparuk-at ti alegasion nga agisubmitir dagiti dokumento ken dadduma pay a nadagsen nga ebidensia tapno paneknekan dagiti akusasionda.
Innayonna a nasken a maiyataday iti kinapudno ken ebidensia ti aniaman nga akusasion ken saan a sarita laeng.
