LAOAG CITY – Nagkedked ti Malacañang a mangipaay ti komento mainaig iti naibasura a petision para iti interim release ni dati a Presidente Rodrigo Duterte.
Inbatad ni Palace Press Officer Claire Castro, baybay-an lattan dagiti abugado ken kampo ni Duterte nga agtignay maipapan iti daytoy a banag.
Inlawlawagna nga awan ti biang ti gobierno iti sangsangoen a kaso ti dati a Presidente ken naminsan manen nga inpettengna nga awan ti pakainaigan ti administrasion Marcos.
Kabayatanna, sinungbatan ni Castro ti rakurak ni Davao City Rep. Paolo Duterte a maipagarup a “political theater” ti addang ti International Criminal Court (ICC) ken nagpangta kontra kadagiti ibilangna a “kidnapers” ti amana.
Inpetteng ni Castro, nasken a maipakat ti rule of law ken saan a pammutbuteng wenno panangpangta gapu ta ti Pilipinas ket maysa a sibilisado a pagilian isu a nasken laeng nga agsungbat iti babaen ti legal a proseso.
