LAOAG CITY – “We wish him all the luck.”
Daytoy ti sungbat ti Malacañang iti rakurak ti lead counsel ni dati a Presidente Rodrigo Duterte a ni Atty. Nicholas Kaufman mainaig iti posible a “political manipulation” iti kaso ti dati a Presidente iti International Criminal Court (ICC).
Inbatad ni Palace Press Officer Claire Castro, kas padana nga abugado, maawatanna ti kalikagum ni Kaufman a maipangabak ti kaso ti klientena isu a respetarenda ti rakurak ken diskarte daytoy.
Nupay kasta, inlawlawagna a kasapulan nga ikonsiderar ni Kaufman dagiti rakurak idi ti klientena nga inadmitirna ti panangpapatay kadagiti biktima ti nadara a drug war.
Kunana a nasayaat no ammoen ni Kaufman ti situasion dagiti pamilia ken biktima ti extrajudicial killings (EJKs) a nakapasar ti harassment wenno pammutbuteng manipud mismo kadagiti supporters ti dati a Presidente.
