LAOAG CITY – Inbalakad ti Malakanyang ken ni Senador Imee Marcos nga imbitaran dagiti international legal expert iti imbestigasyon na iti pannakaarestar ni dati a Presidente Rodrigo “Digong” Roa Duterte.
Inbatad ni Presidential Communications Office Undersecretary ken Palace Press Officer Claire Castro a napinpintas no agimbitar pay ni Senadora Marcos ti international law experts tapno ad-adda a malawlawagan daytoy.
Iti preliminary findings, inpetteng ni Marcos nga adda dagiti maipagarop a panaglabsing a naaramid iti panangarestar ken ni dati a Presidente Duterte.
Kinastigar pay ti senadora ti saan a panagatendar ken panangisnab ti Cabinet officials iti second Senate committee hearing iti panangarestar ken ni dati a Presidente Duterte.
Nagdudua pay daytoy nga adda ti “cover up” iti events a napasamak iti panawen ti operasyon kontra ken ni Duterte.
Iti report, inpasigurado ni Senate President Chiz Escudero a mapanen agatendar iti panagdengngeg dagiti opisyales nga inimbitaran ni Senadora Imee Marcos seknan iti pannakaarestar ni dati a Presidente Duterte.
Immunan a naiyeskedyul ti panagdengngeg idi kalman ngem naiyakar daytoy intono huwebes, Abril 10.
