LAOAG CITY – Mamati ti Malakanyang a saan nga agballigi ti impeachment complaint nga inpila kontra ken ni Presidente Ferdinand Marcos Jr.
Daytoy ket iti baet a rimmuar iti impeachment proceedings ti House Committee on Justice a sufficient in form ti inpila a reklamo kontra iti Presidente.
Inbatad ni Palace Press Officer Atty. Claire Castro nga inkalintegan ti Presidente nga awan ti inaramidna a saan nga umiso ken awan ti inaramidna a panaglabsing iti linteg tapno agbalin nga impeachable offense isut gapuna nga agtalek daytoy iti bagina.
Iresrespetar ti ehekutibo ti proseso ti Kamara de Representantes ken saan a makibiang kadagiti agpanpanday linteg nga aramiden ti trabahoda.
Kagiddan daytoy, kuna ni Castro a madanagan ti Presidente iti impeachment case a saan a para iti bagina no diket ti agbalin nga epekto daytoy iti ekonomia.
Tinagabassit met ti Malacañang ti rakurak ti Makabayan bloc a ni Presidente Marcos Jr. ti “big fish” iti maipagarup nga organized plunder ken inpadada pay ti Presidente iti amana a ni dati a Presidente Ferdinand Marcos Sr.
Kunana nga uray kaano ket nakaal-alisto para kadagiti anti-Marcos ti agpabasol ken agsarita iti sango ti camera ngem saanda met a mapaneknekan dagiti akusasionda.
