LAOAG CITY – Nagun-od ti manager ti Domino’s pizzeria iti Virginia ti titulo a “World’s Fastest Pizza Maker” kalpasan a nakaaramid ti tallo a dadakkel a pies iti uneg ti 31.22 seconds.
Ni Richard Delcid a residente iti Manassas ket nagun-od na ti umuna a pwesto iti Domino’s World Fastest Pizza Making Competition idiay Las Vegas, a nakagun-odan na ti $5,000 a cash prize, trophy ken ti championship belt.
Nagaramid ni Delcid ti tallo a pizza a dagitoy ket flavor a pepperoni, mushroom ken cheese.
Inbatad ni Delcid a dakkel a banag kenkuana ti pannakagun-od na ti nasao a titulo.
Inlawlawag na a ti naisayangkat a kompetisyon ket saan laeng a maipapan iti kinapartak nga aggunay no di ket maipanggep iti panangipaay ti kalidad iti baet ti pressure, a kas ti ar-aramiden da nga inaldaw iti pagpapaayan na a panganan.
Inadmitir na a sumagmamano a tawen ti panagsagana na para iti nasao a titulo, ken nagyamanan na ti trainer na ni Joe Burr gapu ta no saan nga isuna ket dakkel ti posibilidad na a saan met a nagballigi.
