LAOAG CITY – Natay ti maysa a mangngalap a senior citizen kalpasan a nalmes iti karayan iti Barangay Gabut Sur iti ili ti Badoc.
Binigbig ni Police Lt. Jonathan Alonzo, ti Deputy Chief of Police iti ili ti Badoc ti biktima a ni Edwin Rabor y Evangelista, agtawen ti 63, naasawaan, mangngalap ken residente metlaeng iti nadakamat a barangay.
Segun ken ni Alonzo, napan nagkalap ti biktima iti oras ti alas-2 ti malem, ngem idi rumabiim a saan pay a napasangpet ti pamilya na ket ditoyen a nagbalaw da ken nagtitinnulong dagiti kabagyan na tapno mapan biruken daytoy.
Kuna ni Alonzo nga iti panagsawar dagiti kabagyan ti mangngalap ket nakita da daytoy a nakapaklep iti karayan nga addaan laeng ti kauneg ti danom a 1.5 meters.
Intaray da ti biktima iti ospital ngem naideklarar a dead on arrival, ngem saan a masinunuo ti opisyal no mano nga orasen a pimmusay ti mangngalap sakbay a nabirukan dagiti kabagyan na.
Inpakaammo ni Alonzo a basar iti imbestigasyon da ket adda ti maintenance ti biktima gapu ta daytoy ket nagpasar ti mild stroke iti kallabes, no sadinno a ti sakitna ti patienda a rason iti pannakalmes na.
Kabayatanna, nagpalagip ni Alonzo kadagiti mangngalap a no tumappog iti baybay tapno mapan agkalap ket masapol nga adda latta koma ti kadwa da ken liklikan ti agmaymaysa.
