LAOAG CITY – Ad-adda pay a pinaigetan ti Manila ti kampania kontra iti panagwaras ti Human Immunodeficiency Virus, Acquired Immunodeficiency Syndrome ken dadduma pay a sexually transmitted infections (STIs) iti babaen ti baro nga ordinansa a pinirmaan ni Manila Mayor Francisco “Isko Moreno” Domagoso.
Gagem ti ordinansa a mangidatag ti ad-adda a sistematiko ken komprehensibo nga addang iti panangliklik, panagpakonsultar ken panagpaagas dagiti nasao a sakit pakairamanan ti panangipaay ti umdas nga ammo nangruna kadagiti agtutubo a sektor a maibilang a kritikal iti kampania kontra iti Human Immunodeficiency Virus.
Inaramid ti panagpinnirma iti nasao nga ordinansa kagiddan iti panangselebrar ti Manila Summer Pride Parade 2026 no sadinno nga intandudo ti adbokasia ti salun-at ken inklusibo a serbisio iti baet ti namaris a panagtitipon ti LGBTQIA+ community ken dagiti mangsupsuporta daytoy.
