LAOAG CITY – Naisayangkat ti nagdumaduma nga “skills training” ti Public Employment Service Office wenno PESO ti gobierno probinsial ti Ilocos Norte babaen iti pannakikammayetna iti Technical Education and Skills Development Authority wenno TESDA.
Segun ken ni Mrs. Anne Marie Lizette B. Atuan, ti mangidadaulo iti nasao a pangopisinaan, nairanta ti nasao nga aktibidad para kadagiti mannalon ken mangngalap ditoy probinsia.
Inlawlawagna a ti Provincial Agriculture Office ti nangbigbig kadagiti nagbalin a benepisiario.
Mainaig iti daytoy, kunana a dagiti mannalon ken mangngalap iti ili ti Currimao ti nakita ti nadakamat a pangopisinan nga agkasapulan ti tulong rason a naiyuswat dagiti nasao a panagsanay iti nadakamat nga ili.
Inbatadna a naisayangkat ti fish production para kadagiti gunglo dagiti mangngalap iti nadakamat nga ili.
Inlawlawagna a naiyadal kadagitoy ti pakaseknan ti “basic entrepreneur” ken no kasano ti panangiproseso iti nagdumaduma a klase ti ikan.
Innayon ni Atuan a kalpasan ti idadalan dagiti nasao a mangngalap iti nasao nga “skills training” ket naituding a maipaayan dagiti benepisiario ti “starter kit.”
Immuna iti daytoy, iti nasapa a paset ti bulan ti Marso ket immuna a naipadalan iti “skills training” dagiti gunglo dagiti mannalon iti met laeng nadakamat nga ili.
Inlawlawagna a naisuro kadagiti nadakamat a mannalon ti pakaseknan ti panagtarimaan ti makina a pagpadanum ken nagdumaduma a makinaria a pagtalon nga ipapaay ti gobierno kadakuada.
Kunana a babaen iti daytoy ket ammoda no kasano a bumayag iti panangusarda kadagitoy a makinaria.
Inpanamnama a sumarsaruno dagiti dadduma a Local Government Units wenno LGU’s ditoy probinsia a pakaisayangkatan dagiti skills training.
