LAOAG CITY – Nagballaag ti Commission on Elections (Comelec) iti publiko kontra kadagiti agwarwaras a post ken mensahe iti online a mangididiaya ti tulong pinansyal tapno makagun-od iti sertipikasion ti botante.
Inpalagip ahensya iti publiko a ti nasao a dokumento ket libre a maipapaay.
Iti maysa nga advisory, inpetteng ti Comelec a saan nga otorisado ti komisyon kadagitoy a post ken mensahe.
Inlawlawag ti poll body a dagiti voter certificates ket naglaon iti personal ken sensitibo nga impormasion a personal laeng a maala ti botante wenno ti maysa a tao nga otorisado ti botante babaen ti authorization letter.
Inbalakad ti Comelec iti publiko a makitransaksion da laeng iti Comelec Main Office iti Intramuros, Manila, wenno kadagiti field offices ti ahensya iti bukod da a siudad, distrito wenno munisipyo.
