LAOAG CITY – Agtultuloy dagiti sumagmamano a programa ti Land Transportation Franchising and Regulatory Board (LTFRB) para kadagiti driver ken commuter kabayatan ti election spending ban mainaig iti Barangay at Sangguniang Kabataan Elections (BSKE) inton Nobiembre 2.
Inbatad ni Commission on Elections (COMELEC) Chairman George Garcia, a gagem ti exemption a masigurado ti agtultuloy a serbisio ken ayuda para kadagiti kualipikado a benipisiario kagiddan ti spending ban.
Pakairamanan dagiti napalubusan nga ituloy ket ti Fuel Subsidy Program, Love Bus Libreng Sakay, EDSA Busway Extension, ken ti binulan nga ayuda para kadagit kualipikado a benipisiario ti Public Transport Modernization Program wenno PTMP.
Nupay kasta, adda dagiti kondision ti Commission on Elections iti pannakaipatuloy dagiti programa kas ti pannakaipawil ti panagatendar wenno pannakipaset dagiti elective official, kandidato, nominee ken aspirant iti panangibunong ti ayuda.
Malaksid iti daytoy, saan pay a mausar dagiti programa tapno maimpluwensiaan ti resulta wenno proseso ti eleksion.
Mainaig iti daytoy, dinutokan pay ti poll body ti Land Transportation Franchising and Regulatory Board (LTFRB) nga isubmitir ti guidelines dagiti programa ken regular a report iti panagusar ken panangiruar ti pondo.
Nagballaag ti komision a mabalin nga ibabawi ti exemption no mapaneknekan a saan a sinurot ti Land Transportation Franchising and Regulatory Board (LTFRB) dagiti naikeddeng a kondision.
Maipalagip a nangrugi idi Setiembre 18 ti election spending ban ken agpaot agingga Nobiembre 1, maysa nga aldaw sakbay ti Barangay at Sangguniang Kabataan Elections (BSKE).
