LAOAG CITY – Naarestar ti maysa a mannalon iti naisayangkat a drug buy-bust operation iti kataltalunan a paset ti Barangay 24 iti ili ti San Nicolas.
Nabigbig ti suspek a ni William Ramos, addaan ti umno a tawen, mannalon ken residente met laeng iti nadakamat a barangay.
Kinemmeg dagiti otoridad ni Ramos kalpasan a naglako ti maysa a sachet a maipagarop a naglaon ti shabu nga agbalor ti sangaribo a pisos.
Iti panangkapkap dagiti otoridad ken ni Ramos ket nakaala da pay ti maysa a sachet a naglaon met laeng ti maipagarop a shabu ken ti 400 a pisos a personal a kwarta ti suspek.
Nupay kasta, inpetteng ti suspek a ti laeng kwarta na ket ti 400 a pisos ken dagiti naala nga ebidensya ket inpabulsa da laeng kenkuana.
Inyistorya na nga adda dagiti napan agdamdamag a gumatang ti kalding ngem nakigtot idi maipagarop a kellaat da lattan a ginnamatan ken pinosasan.
Kabayatanna, inbatad ni Barangay Chairman Joel Aliga iti nadakamat a barangay a ti suspek ket drug surrenderee idi 2017.
Innayon na a saanna a mamonmonitor a kanayun ken manmano laeng a makita na daytoy isut gapuna a saanna a maibaga no nagsubli ti suspek iti illegal nga aktibidad na wenno saan.
