LAOAG CITY – Natay ti maysa a mannalon kalpasan a nalmes iti maysa a piskaria iti Brgy. 17, Tabug iti siudad ti Batac.
Nabigbig ti biktima Rommel Daja, agtawen iti 49 ken residente iti nasao met laeng a barangay.
Basar iti naiwayat nga imbestigasion ti Batac City Police Station, segun iti kabsat ti biktima nga agnagan ti Jessie Daja ket kabayatan ti panangikabilda ti alad iti nasao a piskaria ket ditoy a nakitana nga agtatapaw ti kabsatna a maysa a nalamiisen a bangkay.
Maibasar kadagiti otoridad a sakbay ti insidente, naginom ti biktima iti pagtaenganda ken nagna iti asideg iti piskaria a posible a natnag daytoy gapu iti kinabartekna.
Mainaig iti daytoy, basar iti medical examination ni Dr. Hazel Resurrecion, City Health Officer iti siudad ti Batac nga awan ti nakita a foul play iti pannakatay ti biktima.
Kabayatanna, agtultuloy met pay laeng ti naun-uneg nga imbestigasion dagiti otoridad maipapan iti nasao nga insidente.
