LAOAG CITY – Nagsagaba ti nakana a sugat ti maysa a lalaki kalpasan a nabagkong iti akin-kannawan nga ima na kangrunaan na iti pulso na iti Barangay 34, Isic-Isic iti ili ti Vintar.
Daytoy ti inbatad ni Police Major Arnel Tabaog, ti chief of police iti ili ti Vintar.
Binigbig ni Tabaog ti biktima a ni Roberto Sagun idinto a ti suspek ket pada na met laeng a mannalon, agpada nga addaan iti umno a tawen ken residente iti nadakamat a barangay
Inlawlawag ni Tabaog nga adayo ti nadakamat a barangay isut gapuna a sakbay a naidanun iti ospital ti biktima ket adon ti nagsayasay a dara na.
Inbaga na a basar iti imbestigasyon da ket addan ti dati a susik dagiti dua ken kabayatan ti panagparti da ket maipagarop a saan a nagustwan ti suspek ti panangiyawat ti biktima ti kutsilyo a pagparpartida.
Gapu iti daytoy, ginandat ti suspek a bagkungen ti bagi ti biktima ngem ti akin-kannawan nga ima kangrunaan na iti pulso ni Sagun ti natamaan.
Kuna ni Tabaog nga agatiddog ti 17 a pulgada ti nausar iti napasamak a krimen.
Innayon na a gapu iti napasamak ket inpila da ti frustrated homicide ngem iti panangrebisar ti piskalya ket nagtennag laeng a physical injury ti kaso ti suspek.
Iti agdama, nagtalinaed iti ospital ti biktima idinto a ti suspek ket adda iti kustodyar ti PNP iti ili ti Vintar.
