LAOAG CITY – Inbatad ni Barangay Chairman Pete Duldulao iti Barangay 21 iti ili ti San Nicolas a nakapagsasarita dan kada Mayor Mike Hernando ken ti municipal engineer seknan iti maperperdi a rangtay iti nadakamat a barangay.
Inpakaammo na a kalpasan ti panagsasarita da ket adda a dagus ti nailatang a pondo a nakurang a maysa a milyon a pisos para ti pannakatarimaan ti nasao a proyekto.
Gapu iti daytoy, ibilang ni Duldulao a nasolbaren ti nabayag a problema iti barangay da.
Segun iti kapitan, umabot agingga iti 400 a residente ti maapektaran ti maperperdi a rangtay no saan a matarimaan daytoy.
Maipalagip a nabayagen a problema ti barangay ti maperperdi a rangtay ngem ita laeng a naaksyunan kalpasan nga adda ti nangipost iti social media kangrunaan na iti facebook.
Kuna ni Duldulao nga addan 50 a tawen ti rangtay ngem idi pimmigsa ti danom ket nakarakaran rason a nadadael daytoy.
